MCX Gold rate fall: दिवाळीच्या मुहूर्तावर सोने आणि चांदीच्या दरात (Gold-Silver Price) झालेल्या घसरणीमुळे ग्राहकांना मोठा दिलासा मिळाला आहे. ऐतिहासिक दरवाढीनंतर आता सोन्या-चांदीच्या किंमती (Gold Rate Today) कमी झाल्याने खरेदीसाठी योग्य संधी निर्माण झाली आहे. गेल्या काही आठवड्यांपासून सोन्याच्या दरांमध्ये मोठी वाढ झाली होती, पण सध्या बाजारातील घडामोडींमुळे दर कमी झाल्याचे दिसून येत आहे. याचा फायदा घेण्यासाठी ग्राहक दिवाळीच्या खरेदीला उत्साहाने लागले आहेत.
चालू आठवड्यात सोन्या-चांदीची मोठी घसरण
गेल्या काही दिवसांतील दरवाढीनंतर सोन्या-चांदीचे दर कमी झाल्याची वार्ता ग्राहकांसाठी एक सुखद ठरली आहे. दिल्लीच्या सराफा बाजारात शुक्रवारी सोन्याचा भाव १,१५० रुपयांनी कमी होऊन ८०,०५० रुपये प्रति १० ग्रॅम झाला.
तसंच, चांदीच्या दरातही मोठी घट दिसून आली, ज्यामध्ये २,००० रुपयांची घसरण होऊन ९९,००० रुपये प्रति किलोचा दर झाला आहे. गुरुवारी चांदी १.०१ लाख रुपये प्रति किलो होती, परंतु ती आता ९९,००० रुपयांवर आली आहे.
याशिवाय, सोन्याच्या शुद्धतेनुसार देखील दरात बदल दिसून आला. ९९.५% शुद्धतेच्या सोन्याचा भाव ३५० रुपयांनी घसरून ८०,४५० रुपये प्रति १० ग्रॅम झाला, तर ९९.९% शुद्धतेच्या सोन्याचा भाव १,१५० रुपयांनी कमी होऊन ८०,०५० रुपये प्रति १० ग्रॅम झाला आहे.
दर कमी का झाले?
दर कमी होण्यामागे स्थानिक बाजारातील कमी मागणी आणि आंतरराष्ट्रीय बाजारातील स्थिती यांचा मोठा वाटा आहे. स्थानिक बाजारात ज्वेलर्स आणि रिटेल विक्रेत्यांकडून सोन्या-चांदीच्या खरेदीला मागणी कमी झाली आहे. आंतरराष्ट्रीय बाजारात सोन्याच्या दरात घट झाल्यामुळे देशातील दरही खाली आले आहेत. तसेच, मल्टी कमोडिटी एक्सचेंज (MCX) वर फ्युचर्स ट्रेडमध्ये देखील सोन्याचे वायदे दर कमी झाले आहेत.
MCX वर डिसेंबरसाठी सोन्याचा वायदा ४०६ रुपयांनी कमी होऊन ७७,९२१ रुपये प्रति १० ग्रॅम झाला आहे, तर डिसेंबरसाठी चांदीचा वायदा भाव १,१३४ रुपयांनी कमी होऊन ९५,८९८ रुपये प्रति किलोवर आला आहे.
सोने-चांदी खरेदीसाठी योग्य संधी
सणासुदीच्या काळात सोन्याचे पारंपारिक महत्त्व असल्याने दिवाळीपूर्वीची ही घसरण ग्राहकांसाठी सुवर्णसंधी आहे. विशेषतः लग्नसराईच्या काळात सोन्या-चांदीची खरेदी करण्यासाठी हा काळ लाभदायक ठरू शकतो. कुटुंबांसाठी सोने खरेदीचा विचार करणाऱ्यांसाठी सध्याची घसरणीचा मोठा दिलासा मिळाला आहे.
भविष्यात कसे राहतील दर
अशा स्थितीत पुढील काही दिवसांत आंतरराष्ट्रीय बाजारात घडणाऱ्या घडामोडींवर आधारित दरात चढ-उतार होण्याची शक्यता आहे. सध्या भारतीय ग्राहकांसाठी हे दर आकर्षक असले तरी, पुढील काळात मागणीत वाढ झाल्यास किंमतीत पुन्हा वाढ होऊ शकते.